امەريكانىڭ اتاقتى ميللياردەرى، قارجىگەر مامان دجوردج سوروس «ەۋروپا، ويان!» اتتى ماقالاسىندا «قارت قۇرلىقتىڭ» باسشىلارىن شەشىم قابىلداۋدا مۇقياتتى بولىپ جانە ونىڭ ورىندالۋىن قاتاڭ باقىلاۋعا شاقىردى.

–ەۋروپا ءوزىنىڭ مىقتى مەملەكەتتەردىڭ جيىنتىعى ەكەنىن ەستەن شىعارىپ بارادى. ازىرگە بارىنە دە مۇمكىندىك بار، ءالى كەش ەمەس. سوندىقتان ەۋروپا ويانۋى قاجەت، ولاي بولماعان جاعدايدا ەۋرووداق 1991 جىلعى سسرو-نىڭ كەبىن كيەدى دە، قۇردىمعا كەتەدى. ءبىزدىڭ قاراپايىم ادامدار دا، مەملەكەت باسشىلارى دا تەز شەشىم قابىلدايتىن كەزەڭ كەلگەنىن ءالى تۇسىنبەي وتىر،–دەيدى دجوردج سوروس.

ويتكەنى ەۋرووداقتى ىدىراتۋعا جۇمىس ىستەپ وتىرعان ارنايى كۇشتەر جەتەرلىك. ولار قازىرگى ۋاقىتتا بارىنشا اعارتۋ جۇمىستارىن جۇرگىزۋدە. ءتىپتى ەۋروپانىڭ وزىندە بىرىگۋدى قالامايتىن تۇلعالار بارشىلىق. سوندىقتان ونى ىدىراتىپ الماۋ جاعىن بارىنشا ويلاعان دۇرىس.

اتاقتى قارجىگەر ماماننىڭ ايتۋىنا قاراعاندا، «ەۋرووداقتى ساقتاپ قالاتىن شەشۋشى كەزەڭ – 2019 جىل. ويتكەنى ۇستىمىزدەگى جىلدىڭ مامىر ايىنان باستاپ، ەۋروپارلامەنتكە سايلاۋ باستالادى. ونىڭ ۇستىنە ءالى دە ەۋروپالىق باعىت ۇستانعان جانە وعان قارسى توپتار جەتەرلىك.

–سوندىقتان دا بىرىنشىدەن ەڭ ۇلكەن قاۋىپ-قاتەر ءتوندىرىپ تۇرعان ەۋروپانى ىشكى جانە سىرتقى جاۋلاردان ساقتاۋ كەرەك. ەكىنشىدەن، ەۋرووداقتىڭ نەگىزىن ۇستاپ تۇرعان قۇندىلىقتاردى ساقتاپ قالۋ قاجەت،–دەيدى ميللياردەر دجوردج سوروس.

راسىن ايتۋ كەرەك، الەمگە اقىل ايتىپ وتىرعان سوروستىڭ وزىنە دە سىن ايتۋشىلار ءقازىر جەتەرلىك. كەيبىر ساراپشىلار «الەمدەگى كوپتەگەن ەلدەردە مەملەكەتتىك توڭكەرىس جاساۋعا سوروستىڭ تىكەلەي ىقپالى بولعان» دەگەندى ايتادى. مۇنى قارجىگەر ءوزى دە جوققا شىعىرمايدى. ءبىر عانا مىسال، 2004 جىلى ۋكرايناداعى «قىزعىلت-سارىلار» توڭكەرىسى بولىپ، مەملەكەت باسىنا ۆيكتور يۋششەنكو، ودان كەيىن 2014 جىلى كييەۆتە قايتادان «ەۆرومايدان» ورىن الىپ، بيلىككە امەريكاشىل  پەتر پوروشەنكو كەلدى. ۋكراينا پرەزيدەنتى پەتر پوروشەنكو «ۋكراين مەملەكەتتىلىگىن قالىپتاستىرۋدا ايرىقشا ەڭبەك سىڭىرگەنى ءۇشىن دجوردج سوروسقا «ازاتتىق» وردەنىن بەرگەنى بەلگىلى.

ءبىر جاعىنان پوروشەنكو سياقتى بيلىك باسىنا كەلگەن مۇددەلەس ادامدار ونى جاقتاپ جاتسا، ەكىنشى جاعىنان ونى جاقتىرمايتىندار دا جەتەرلىك. مىسالى، 2018 جىلى ۆەنگريادا وتكەن سايلاۋدا ەلدىڭ پرەمەر-مينيسترى ۆيكتور وربون «ەلدىڭ ىشكى ىسىنە ارالاستى، كەيبىر ساياسي ۇيىمدارعا جاسىرىن قارجىلاي كومەك كورسەتتى» دەپ وعان ايىپ تاققانى بەلگىلى.

راس، كوپتەگەن ەلدەردە دەموكراتيانى قارجىلاندىرۋ دەگەن جەلەۋمەن سوروستىڭ قورى جۇمىس ىستەيدى. ال ونىڭ پايداسىن كورىپ جاتقاندار از. ال سوروستىڭ «ەۋروپا ىدىراپ كەتۋى مۇمكىن» دەپ الدىن الا ساقتاندىرىپ وتىرعانى بەكەر ەمەس. قازىرگى كەزدە ەۋروپا قۇرلىعىندا رەسەيدى جاقتايتىندار دا بارشىلىق. سوروس سولار كوبەيىپ كەتپەسە دەپ قورقادى...